Itsas-lehorreko jabari publikoa babesteko zortasun-eremuan dauden eraikinak edo instalazioak konpontzeko, hobetzeko, finkatzeko eta modernizatzeko obrak egiteko erantzukizunpeko adierazpena

Nork izapidetu dezake? 

Interesatuta dagoen edozein pertsona, identifikazio elektronikoaren bidez. Talde hauek behartuta daude egitera ⁽²⁾: 

• Enpresak eta elkarteak.
• Nortasun juridikorik gabeko entitateak (sozietate zibilak, jabe-erkidegoak, etab.).
• Profesional elkargokideak (beren jarduerarekin lotutako izapideetan).
• Enplegatu publikoak (beren eginkizunak betetzen dihardutenean).
• Enpresaburu indibidualak edo autonomoak, lanbide-jardueran egiten dituzten izapide eta jarduketetarako.
• Aurreko edozein kolektiboren ordezkariak.

Nola?  

1. Irakurri informazio-orria.
2. Dokumentu osagarriak presta itzazu (gehienez 10MB artxibo bakoitzeko). Zalantzarik baduzu, informazio-orrian kontsulta ditzakezu xehetasun guztiak.

Jarduketa uholde-arriskuko eremu batean egiten denean, nahitaez aurkeztu beharko da Uholde-arriskuari buruzko erantzukizunpeko adierazpenaren.

1. Sartu egoitza elektronikoan, eta jarraitu urrats hauei:

• Identifika zaitez zure bitarteko elektronikoarekin.
• Bete inprimakia.
• Erantsi dokumentuak.
• Sinatu eta bidali.

Nire karpetaren bidez, espedientearen egoera kontsultatu eta izapidetzearen hurrengo urratsak kudeatu ahal izango dituzu.

Non? 

Esteka honen bidez, zuzenean: Erantzukizunpeko aitorpena, itsaso eta lehorraren arteko jabari publikoa babesteko zortasun eremuan dauden eraikuntzetan edo instalazioetan konpondu, hobetu, finkatu eta berritzeko obrak egiteko. (1021801) - Eskaera - Eusko Jaurlaritzako egoitza elektronikoa.

Nork izapidetu dezake?

Pertsona fisikoek edo haien ordezkariek bakarrik, baldin eta elektronikoki egitera behartuta ez badaude. Hala ere, bitarteko elektronikoen bidez ere egin ahal izango dute, eta komunikatzeko modua aldatu ahal izango dute eskabidea izapidetzen den bitartean. 

Nola?

1. Irakurri informazio-orria.
2. Osatu eta sinatu eskabide-eredua. 

• Eskabide-eredua

Jarduketa uholde-arriskuko eremu batean dagoenean, nahitaez aurkeztu beharko da Uholde-arriskuari buruzko erantzukizunpeko adierazpenaren Eredua.

1. Prestatu dagokion dokumentazioa. Zalantzarik baduzu, informazio-orrian kontsultatu ditzakezu xehetasun guztiak. 
2. Erregistratu eskaera toki hauetako edozeinetan:

Non?

1. Uraren Euskal Agentziaren hiru bulegoetako edozeinetan, astelehenetik ostiralera, 08:30etik 14:00etara.
2. Erregistro-gaietan laguntzeko Eusko Jaurlaritzaren bulegoetan.
3. Zuzenean zerbitzuaren bidez: Herritarrei arreta presentziala emateko eredua
4. 39/2015 Legean aurreikusitako edozein modu gehigarri erabilita⁽³⁾.

• Zer alde dago erantzukizunpeko adierazpen baten eta baimen baten artean? 

  Erantzukizunpeko adierazpena dokumentu bat da, adierazpena egin duen pertsonak sinatu duena, non adierazten baitu, bere erantzukizunpean, betetzen dituela indarrean dauden arauetan ezarritako baldintzak, baduela hura egiaztatzen duen dokumentazioa, Administrazioaren esku jarriko duela hala eskatzen zaionean, eta konpromisoa hartzen duela adierazpenean bertan aipatutako aldian zehar betebeharrak betetzeko. Dokumentu horri esker, adierazpena egin duen pertsonak eskubide edo ahalmen baten aitorpena lortzen du, edo eskubide edo ahalmen hori baliatzeko aukera.   

  Uren arloko administrazio-baimena administrazio-egintza bat da, eta, haren bidez, erakunde eskudunak (Uraren Euskal Agentzia edo Konfederazio Hidrografikoa) gaikuntza ematen dio baimenaren titularra den pertsonari edo erakundeari jabari publiko hidraulikoaren edo haren babes-eremuen (zortasuna eta zaintza) erabilera, aprobetxamendu edo jarduketa espezifiko bat egiteko edo itsas-lehorreko babes-zortasuneko eremuan. Baimenaren kasuan, kontrol zorrotzagoa eta legezko betekizunak betetzearen berrikuspen xehatua dakarrelako, ebazpen batean jaso behar da. Ebazpen horrek pertsona edo erakunde titularra identifikatuko du, eta baimendutako jarduketaren ezaugarriak edo bete beharreko baldintzak ezarriko ditu, besteak beste, balio-epea.   

• Zer jardueratarako aurkez dezaket erantzukizunpeko adierazpen bat itsas-lehorreko jabari publikoa babesteko zortasun-eremuan (ILBZE)? 

  Legez eraikitako edo behar bezala legeztatutako ILBZEan lehendik dauden eraikuntzak edo instalazioak konpontzeko, hobetzeko, sendotzeko eta modernizatzeko obrak egiteko.  

• Nola egin behar dut itsas-lehorreko jabari publikoa babesteko zortasun-eremuan (ILBZE) deklaratutako obra edo jarduketa? 

  • Gainera, honako baldintza hauek bete beharko dituzte:  
  • Obrek ez dute ekarri behar debekatutako erabilera batera aldatzea (beste edozein erabileratatik bizitegi- edo bizileku-erabilerara). 
  • Obrek dakarten balio-gehikuntza ezin izango da kontuan hartu desjabetze-ondorioetarako. 
  • Obrek ez dute ekarri behar lehendik dauden eraikuntzen bolumena, altuera edo azalera handitzea. 
  • Obrek ez dute ekarri behar eraispen osorik edo partzialik egitea. 
  • Aplikatzekoa bazaie, obrek energia-efizientzia hobetzea ekarri beharko dute.  
  • Aplikatzekoa den kasuetan, orobat, ur-kontsumoa benetan aurreztea dakarten mekanismoak, sistemak, instalazioak eta banako edo taldeko ekipamenduak erabiliko dira.  

  Baldintza horiek eta deklaratzaileak hitzematen dituen gainerako alderdiak erantzukizunpeko adierazpenean bertan daude. 

• Erantzukizunpeko adierazpen hau aurkezten ez badut, udalak baimenduko al du nire obra? 

  Ez. Udalak ezin ditu obra horiek baimendu, baldin eta ez baduzu egiaztatu Agentzia honetan erantzukizunpeko adierazpen hau aurkeztu duzula, eraikuntzen eta instalazioen titularra den pertsona edo erakunde gisa.  

• Zer aurrerapenez aurkeztu behar dut erantzukizunpeko adierazpena ILBZEan dauden eraikuntzak edo instalazioak konpontzeko, hobetzeko, sendotzeko eta modernizatzeko obrak egiteko?  

  Erantzukizunpeko adierazpena aurkezteak aitortutako jarduketak ezarritako epean egiteko gaitzen zaitu (deklaratzailea), baldin eta betetzen badituzu kostaldeei buruzko araudian eta aplikatu beharreko administrazio-araudian ezarritako baldintzak.  

  Hala ere, jarduketak baldintza horiek betetzen ez baditu, gauzatu ezin dela jakinaraziko da. Ildo horretan, gomendatzen dizugu erantzukizunpeko adierazpen hau erregistratzea, jarduketa hasi baino hilabete lehenago gutxienez, balorazioa egin ahal izateko.  

• Zer balio-epe du nire erantzukizunpeko adierazpenak ILBZEan dauden eraikuntzak edo instalazioak konpontzeko, hobetzeko, sendotzeko eta modernizatzeko obrak egiteko? Luzapen bat aurkez dezaket?  

  Erantzukizunpeko adierazpen hau erregistratu eta gehienez ere urtebeteko epean egin beharko dituzu jarduketak.  

  Ezin da inolako luzapenik eskatu. Jarduketa ezin bada adierazitako epean gauzatu, beste adierazpen bat aurkeztu behar da. 

• Zer dira itsas-lehorreko jabari publikoa babesteko zortasun-eremua (ILBZE) eta igarobidearen zortasun-eremua? 

  Itsas-lehorreko jabari publikoak (aurrerantzean, ILJP) bi babes-zerrenda ditu:  

  • Igarobidearen zortasun-eremua: Sei metroko zerrenda da, itsasertzaren barruko mugatik lehorraren aldera neurtuta. Eremu hori libre utzi beharko da une oro, oinezkoak eta zaintza- eta salbamendu-ibilgailuak igaro daitezen, salbu eta babes-araubideren bat duten espazioak badira.  
  • Babesteko zortasun-eremua: 100 metroko zerrenda da, itsasertzaren barruko mugatik lehorraren aldera neurtuta. Zortasun hori, Kostaldeen Legea indarrean hasi zenean hiri-lur gisa sailkatutako lursailetan, oro har, 20 metrokoa izan ohi da. 

  Itsas-lehorreko jabari publikoa eta jabari hori babesteko zortasun-eremua definitzen dituen eskema

    

  Itsas-lehorreko jabari publikoaren eta jabari hori babesteko zortasun-eremuaren mugaketa Uraren Euskal Agentziaren bisorean kontsultatu daiteke. Dagokion geruza ikusteko, joan Geruzen zerrendara, ireki beste iturri batzuetako geruzak atala, eta hautatu IDEE. Estatukoak eta, ondoren, Mugak eta bi aldiz Itsaso eta lehorraren jabari publikoaren mugaketa. Incluir el link al visor 

• Zer jarduera egin ditzaket baimenik gabe itsas-lehorreko babes-zortasuneko eremuan?  

  • Laboreak eta landaketak, hargatik eragotzi gabe uztailaren 28ko 22/1988 Legearen 27. artikuluan ezarritakoa.  
  • Eremu horretako lehen 20 metroetan, aldi baterako utzi ahal izango dira itsasoak botatako objektuak edo materialak, eta itsas salbamenduko eragiketak egin ahal izango dira. 

Erakundeak:

Kudeatzen eta ebazten duen erakundea: Uraren Euskal Agentzia.

Araudia:

• ⁽¹⁾Kostaldeei buruzko Erregelamendu Orokorra onartzen duen urriaren 10eko 876/2014 Errege Dekretuaren 46. artikulua.
• ⁽²⁾Administrazio Publikoen Administrazio Prozedura Erkidearen urriaren 1eko 39/2015 Legearen 14. artikulua
• ⁽³⁾Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikulua
• Kostaldeei buruzko uztailaren 28ko 22/1988 Legea.
• 2/2013 Legea, maiatzaren 29koa, itsasbazterraren babes eta erabilera jasangarriari buruzkoa eta Kostaldeei uztailaren 28ko buruzko 22/1988 Legea aldatzen duena
• 876/2014 Errege Dekretua, urriaren 10ekoa, Itsasbazterren Araudi Orokorra onartzen duena.
• Abuztuaren 29ko 196/1997 Dekretua, itsas lehorreko jabari publiko hidraulikoko zortasun-zona erabiltzeko eta lehorretik itsasora isurketak egiteko baimenak emateko prozedura ezartzen duena (97-09-23ko EHAA; 181. zk.).
• 35/2016 Errege Dekretua, urtarrilaren 24koa, zeinaren bidez onartzen baita berrikus daitezela Kantauri Mendebaldeko, Guadalquivirreko, Ceutako, Melillako, Segura eta Jucarreko eta Kantauri Ekialdeko demarkazio hidrografikoetako plan hidrologikoak eta Miñoko, Sileko, Dueroko, Tajoko, Guadianako eta Ebroko demarkazio hidrografikoen Espainiako zatikoak.

Kodea: ILBZEn dauden eraikinak edo instalazioak konpontzeko, hobetzeko, finkatzeko eta modernizatzeko obrak egiteko erantzukizunpeko adierazpena 1039701